ချောင်းဆိုးရင်ကြပ်အတွက် လွယ်ကူ အကုန်အကျနည်းတဲ့ အိမ်တွင်းဆေးနည်းတစ်လက်

ရာသီဥတုအပူအအေး မမျှတဲ့အခါ အအေးမိ၊ ချောင်းဆိုးတာတွေ ဖြစ်တတ်ပါတယ်။ ရာသီဥတုကြောင့် မဟုတ်ဘဲ ဆေးလိပ်သောက်ခြင်း၊ လေထုညစ်ညမ်းခြင်း၊ ဆေးလိပ်ငွေ့ခံခြင်းနဲ့ အသက်အရွယ် အိုမင်းလာခြင်းတို့ကြောင့်လည်း ချောင်းဆိုးတတ်ပါသေးတယ်။ တကယ်လို့ ချောင်းဆိုးတာ ရက်သတ္တပတ် (၃) ပတ်ထက် ကြာရင်တော့ စိုးရိမ်ဖွယ်ရာလို့ ယူဆနိုင်ပြီး ရက်သတ္တပတ် (၈)ပတ် အထက်ဆိုရင်တော့ နာတာရှည်ချောင်းဆိုးရင်ကြပ်နာလို့ မှတ်ယူနိုင်ပါတယ်။

ချောင်းဆိုးခြင်းဟာ အကြောင်းအရင်းများစွာကြောင့် ဖြစ်နိုင်ပါတယ်။ သာမန်အအေးမိတာ၊ တုပ်ကွေးဖြစ်တာ၊ ဓာတ်မတည့်တာတစ်ခုခုကို ရှူသွင်းမိတာ၊ အဆုတ်ယောင်တာနဲ့ ကြက်ညှာချောင်းဆိုးတို့ကြောင့် ဖြစ်နိုင်ပါတယ်။ တစ်စုံတစ်ခုနဲ့ ဓာတ်မတည့်တဲ့ အလက်ဂျီရှိသူတွေ၊ ပန်းနာရင်ကြပ်ရှိသူတွေ၊ အစာအိမ်ရောဂါတစ်မျိုးဖြစ်တဲ့ Gastroesophageal reflux disease (GERD)  နဲ့ နှာတွင်းထဲ နှာရည်ယိုသူတွေဟာ နာတာရှည်ချောင်းဆိုးရောဂါကို ခံစားရလေ့ ရှိပါတယ်။

တကယ်တော့ ချောင်းဆိုးရတဲ့အကြောင်းရင်းဟာ အဆုတ်ထဲမှာရှိနေတဲ့ ပြင်ပအရာဝတ္ထုတွေနဲ့ အကျိအချွဲတွေကို ဖယ်ရှားပေးဖို့ ခန္ဓာကိုယ်က အလိုအလျောက် လုပ်ဆောင်နေတာပဲ ဖြစ်ပါတယ်။ ချောင်းဆိုးရောဂါ ဖြစ်ပွားရတဲ့ အကြောင်းအရင်းကို တစ်ခါတစ်လေမှာ တွေ့ရလွယ်ကူပေမယ့် တစ်ခါတစ်လေတော့လည်း ဘာကြောင့်ရယ်လို့ ကွဲကွဲပြားပြားမသိဘဲ ဆုံးဖြတ်ဖို့ ခက်ခဲလှပါတယ်။

အမှန်တော့ ချောင်းဆိုးတဲ့အခါ ဆေးဆိုင်သွားပြီး ချောင်းဆိုးပျောက်ဆေးရည် ဝယ်သောက်လိုက်ရင် အဆင်ပြေမှာ ဖြစ်ပေမယ့် သုတေသနပညာရှင်တွေဟာ ဆေးဝါးတွေကို အားမကိုးဘဲ အစွမ်းထက်ထိရောက်တဲ့ ဆေးနည်းတစ်လက်ကို ရှာဖွေတွေ့ရှိခဲ့ပါတယ်။ ဒီဆေးနည်းဟာ ဘာကြောင့်ပဲ ချောင်းဆိုးဆိုး ခန္ဓာကိုယ်ရဲ့ အသက်ရှူစနစ်ကို လွယ်လွယ်ကူကူ သန့်ရှင်းနိုင်တဲ့ ဘက်စုံသုံး သဘာဝဆေးနည်းပဲ ဖြစ်ပါတယ်။

ဆေးနည်းက ငှက်ပျောသီးနဲ့ ပျားရည်ကို အဓိကအခြေခံထားပါတယ်။

ပါဝင်ပစ္စည်း

• ငှက်ပျောသီးမှည့်(၂) လုံး
• ပျားရည်သန့်သန့် စားပွဲတင်ဇွန်း(၂) ဇွန်း
• ေရ (၄၀၀ မီလီမီတာ)

ပြုလုပ်နည်း

• ငှက်ပျောသီးတွေကို ခွက်တစ်လုံးထဲ ထည့်ပြီး ကြိတ်ချေပါ။
• ရေ(၄၀၀ မီလီမီတာ) ကို ဆူအောင်တည်ပြီး ငှက်ပျောသီးချေထားတဲ့ ခွက်ထဲလောင်းထည့်ပေးပါ။
• နာရီဝက်လောက် အဖုံးအုပ်ပြီး ထားလိုက်ပါ။
• ပြီးတဲ့အခါ ပျားရည်ရောကာ ထပ်မွှေပြီး စားသုံးနိုင်ပါပြီ။

တစ်ခါပြုလုပ်ပြီးတိုင်း ပမာဏနည်းနည်းစီနဲ့ တစ်နေ့ကို (၄) ကြိမ်စားသုံးပေးနိုင်ပါတယ်။ အေးနေရင်တော့ ခပ်နွေးနွေးလေး ဖြစ်အောင် အပူနည်းနည်းပေးလိုက်တာ ပိုကောင်းပါတယ်။ ငှက်ပျောသီးဟာ အသက်ရှူလမ်းကြောင်းကို သန့်ရှင်းစေတဲ့အပြင် ဆယ်ရိုတိုနင် လယ်ဗယ်ကို မြင့်မားအောင် အထောက်အကူပြုပါတယ်။ နှစ်နှစ်ခြိုက်ခြိုက် အိပ်ပျော်စေအောင်လည်း အထောက်အကူ ပေးတာကြောင့် စာဖတ်သူတွေကို ညဘက် ကောင်းကောင်းမအိပ်နိုင်အောင် အနှောင့်ယှက်ပေးနေတဲ့ ချောင်းဆိုးရောဂါကို ဖော်ပြထားတဲ့ ဆေးနည်းလေးနဲ့ တိုက်ဖျက်ကြည့်ဖို့ အကြံပြုလိုက်ပါတယ်။

Crd:လင်းလင်း (ShweMom)