အဆစ်အမြစ်ရောင်၊ နာကျင်ကိုက်ခဲတာတွေအတွက် ထိရောက်တဲ့အိမ်တွင်းကုထုံးများ

အသက်အရွယ်ရလာတာနဲ့ လူတွေမှာ အဆစ်အမြစ်ရောင်ရမ်းတာ၊ နာကျင်ကိုက်ခဲတာမျိုး ဖြစ်နိုင်ခြေ များလာပါတယ်။ ဒီလိုအဆစ်ရောင်နာဝေဒနာတွေဟာ အမျိုးအစားအမျိုးမျိုးရှိနိုင်ပါတယ်။ အဖြစ်အများဆုံးက အရိုးအဆစ်ရောင်ရမ်းနာ ဖြစ်ပါတယ်။ ဒီရောဂါမှာဆိုရင် အရိုးတွေကို တည့်မတ်အောင်လုပ်ပေးတဲ့ အရိုးနုအလွှာလေးတွေဟာ အားနည်းလျော့ရဲလာတဲ့အတွက် အရိုးအဆစ်တွေ ရောင်ရမ်းတာ၊ ဖူးယောင်တာ၊ နာကျင်တာမျိုးတွေ ဖြစ်လာပါတယ်။ ဒီလိုအရိုးအဆစ်ရောင်ရမ်းနာတွေကို အိမ်တွင်းကုထုံးတွေနဲ့ ဘယ်လိုသက်သာအောင် နေထိုင်မလဲဆိုတာတော့ brightside ကနေ ကိုးကားဖော်ပြပေးလိုက်ပါတယ်။

ကိုယ်အလေးချိန်ကို ထိန်းပါ

ကိုယ်အလေးချိန်များတဲ့အခါ အရိုးအဆစ်တွေပေါ်မှာ ဝန်ပိမှုဖြစ်စေပါတယ်။ မနိုင်ဝန်ထမ်းရတဲ့အခါ အရိုးအဆစ်တွေကြားထဲက အရိုးနုလေးတွေဟာ အလွယ်တကူ ကျိုးကြေနိုင်ပါတယ်။ ရလဒ်အနေနဲ့ အရိုးအဆစ်ရောင်နာက ပိုဆိုးနိုင်ပါတယ်။ ဒါကြောင့် အဆစ်တွေအပေါ်ဖိအားသက်သာအောင်၊ အဆစ်တွေတောင့်တင်းမနေအောင် ခန္ဓာကိုယ်အလေးချိန်ကို သင့်တင့်မျှတအောင် ထိန်းသင့်ပါတယ်။

နှိပ်နယ်ပေးပါ

(၂၀၁၃) ခုနှစ်တုန်းက အဆစ်ရောင်နာရှိတဲ့လူတွေကို လေ့လာမှုပြုခဲ့ပါတယ်။ ဒီလူတွေကို အုပ်စုနှစ်စုခွဲပြီး တစ်စုကိုတော့ ခပ်ပေါ့ပေါ့ပဲ နှိပ်နယ်ပေးကာ နောက်တစ်စုကိုတော့ သင့်တင့်မျှတရုံအားသုံးပြီး နှိပ်နယ်ပေးပါတယ်။ ရက်သတ္တပတ်(၄) ပတ် အကြာမှာ တွေ့ရတာက သင့်တင့်မျှတရုံအားနဲ့ အနှိပ်ခံတဲ့ ဒုတိယအုပ်စုဟာ အဆစ်ရောင်နေတဲ့နေရာတွေမှာ အနာလျော့သွားတဲ့အပြင် ပိုပြီး လှုပ်ရှားသွားလာလို့ ကောင်းတာကိုလည်း တွေ့ခဲ့ရပါတယ်။

အစာအာဟာရစားသောက်ပုံကို ပြောင်းလဲပါ

အဆီ၊ သကြားနဲ့ သန့်စင်ထားတဲ့ ဂျုံမှုန့်ပါဝင်တဲ့ အစားအသောက်တွေဟာ အူထဲမှာ အန္တရာယ်ရှိတဲ့ ဘက်တီးရီးယားတွေကိုမွေးဖွားပြီး သွေးဆီပို့လွှတ်ပါတယ်။ ဒီပိုးမွှားတွေကို တိုက်ခိုက်ဖို့ ခန္ဓာကိုယ်ဟာ ကိုယ့်ကိုကိုယ့် ခုခံကာကွယ်ဖို့လုပ်ရာကနေ မမျှော်လင့်ပဲ ကိုယ်ထဲက တစ်ရှူးအကောင်းတွေကိုပါ တိုက်ခိုက်မိသွားပါတယ်။ ဒါဟာ အရိုးအဆစ်ရောင်နာ ဖြစ်ရခြင်းရဲ့ အဓိကအကြောင်းရင်းပါပဲ။

အရိုးအဆစ်ရောင်နာကို သက်သာစေချင်တယ်ဆိုရင် အစားအသောက်စားပုံစားနည်းကို ပြောင်းလဲပစ်ရမှာပါ။ အူကို သက်သာစေပြီး သန့်စင်တဲ့သွေးတွေကိုဖြစ်ပေါ်အောင် ဟင်းသီးဟင်းရွက်၊ သစ်သီး၊ ပဲနဲ့ အစေ့အဆန်တွေကို များများစားပေးရမှာပါ။ နို့ထွက်ပစ္စည်းတွေနဲ့ ဆီသွတ်ထားတဲ့ အသားတွေကိုတော့ ရှောင်ပေးပါမယ်။

နေ့တိုင်း နေရောင်ခြည်ခံပါ

နေရောင်ခြည်ခံခိုင်းတာကတော့ ဗီတာမင် ဒီ ရအောင်ပါ။ အဝတ်အစားဝတ်ပြီး နေနည်းနည်းလောက် ခံလိုက်ရင်တောင် စာဖတ်သူရဲ့ခန္ဓာကိုယ်ဟာ ဗီတာမင် ဒီ (၂) ပတ်စာလောက် လုံလောက်နေမှာပါ။ တကယ်လို့ စာဖတ်သူဟာ အဆစ်ရောင်နာရှိတယ်ဆိုရင် နေ့တိုင်း နေပူထဲကို မိနစ်အနည်းငယ်လောက် ထွက်ပေးဖို့လိုပါတယ်။ အချိန် အကြာကြီးတော့ မလိုပါဘူး။ သိပ္ပံအထောက်အထားတွေအရ နေရောင်ခြည်ရှားပါးပြီး ရာသီဥတု စွတ်စိုမိုးရွာတဲ့ဒေသမှာနေထိုင်သူတွေဟာ အဆစ်ရောင်တဲ့အခါ နာကျင်မှုဒဏ်ကို ပိုခံစားကြရတယ်လို့ သိရပါတယ်။

ထမင်းစားတိုင်း ဂျင်းစားပေးပါ

ဂျင်းတက်ဟာ ရောင်ရမ်းတာ၊ အဆစ်နာတွေကို ဟန့်တားနိုင်တဲ့ အစွမ်းရှိပါတယ်။ သူ့မှာပါဝင်တဲ့ ဖိုင်တိုကယ်မီကယ် ကွန်ပေါင်းတွေက အဆစ်ရောင်တာကို သက်သာလျော့ပါးစေပါတယ်။ ဂျင်းကို ရေရှည်စားသုံးနိုင်ရင်တော့ အကောင်းဆုံးပါ။ လတ်လတ်ဆတ်ဆတ် စားတာပဲဖြစ်ဖြစ်၊ အမှုန့်ပြုပြီး သောက်တာပဲဖြစ်ဖြစ် ထမင်းစားတိုင်းမှာ မှီဝဲပေးပါ။ အဆစ်ရောင်နာသမားတွေအတွက်တော့ ဂျင်းက အများကြီးအကျိုးပြုတဲ့အကြောင်း ဖော်ပြပေးလိုက်ရပါတယ်။

လင်းလင်း (ShweMom)